Mer benotze Cookien - Se hëllefen eis, fir däin Hattrick-Erliefnes ze verbesseren.
Andeems de eise Site benotz, akzeptéiers de datt mer Cookien op dengem Apparat setzen an drop zougräifen.

Hëllef »   Handbuch »   Aféierung 

Aféierung

Dëst ass d'Handbuch fir Hattrick. Eng méi schnell Aféierung an d'Spill kriss de an der Aféierung fir nei Manager.

Hattrick ass e Spill, an deem s du eng virtuell Futtballséquipe zum Erfolleg féiere kanns, an dat géint Matspiller aus der ganzer Welt.

Hattrick ass en einfacht Spill, et ass liicht, fir d'Grondregelen ze léieren. Du kanns Hattrick och spillen, wann s de dech nëmmen eemol oder zweemol an der Woch connectéiers (mä natierlech hoffe mer, datt mer dech méi oft gesinn). D'Erausfuerderung ass et net, fir méi schlau wéi d'Spill ze sinn, mä se läit an der Competitioun mat den anere Matspiller. Dës Competitioun féiert och dozou, datt d'Matspiller zu Frënn ginn, Hattrick gëtt sou e Gesellschaftsspill.

Deng Aufgaben

Du bass souwuel de Manager wéi och de Besëtzer vum Veräin. Du plangs Taktiken a Strategie, du décidéiers, wat trainéiert gëtt, an du wiels déi Spiller, déi spille sollen. Du keefs a verkeefs Spiller, du investéiers a Verbesserunge vum Stadion a vill aner Saachen. Fir déi, déi wëlle Succès hunn, ass et e gudde Rot, fir eng gutt Strategie ze bastelen an e Plang à long terme. Succès an Éier ginn et net ëmsoss.

Deng nei Équipe

Wann s de deng Équipe kriss, dann huet se eng fräi Plaz an enger vun den zwou ënneschten Divisioune vum Hattrick-System kritt. Däin Opstig fänkt mat engem Spillerkader un (e puer vun deene kënnen e bëssen talentéiert sinn, e puer anerer éischter net...), engem Stadion an e puer Suen als Hëllef. Dono ass et un dir, fir Wonner ze bewierken.

Et ass net schlëmm, wann s de der méi spéit nach eng Kéier Gedanken iwwer den Numm vun denger Équipe méchs. Du kanns dengem Veräi säin Numm ëmmer tëschent de Saisonen änneren, mä et kascht dech 10 000 US$ well Trikoten a Marketing Artikelen geännert musse ginn. Du wäers och 3 % vun denge Supportere aus dem Fanclub verléieren, well e puer vun dengen Hardcore Supporter der net verzeie wäerten, dass den ale Numm opginn ass.

Regiounen a Wieder

Deng Équipe gehéiert zu enger Regioun, enger Regioun, mat där s de wuel eng Relatioun hues. Regioune ginn et, fir datt s de kanns aner Leit aus denger Regioun treffen. Eng aner wichteg Fonctioun ass, datt all Regioun hiert eegent Wieder huet. Keng Regioun ass besser wéi déi aner, all d'Regiounen sinn selwecht, du muss der also keng Gedanken driwwer maachen, datt s de éiere géifs e schlechte Choix maachen.

Vum Wieder hänken e puer Saachen of, virun allem awer mol d'Zuel vun de Spectateuren (et komme manner Spectateuren, wann et reent) an op d'Performance vun de Spiller. Op der Säit vun enger Regioun kanns de d'Wieder vun haut fannen an d'Wiederprevisioune fir muer. Wann et haut d'Sonn schéngt, dann ass et méi wahrscheinlech (am Verglach zu aneren Zorte vu Wieder), datt et muer och sonneg ass. D'Wieder ass also net ganz zoufälleg.

Du kanns tëschent de Saisonen, wann s de dat wëlls, d'Regioun wiesselen. Et kascht dech awer 10 000 US$ an 3% vun denge Supportere verloossen de Fanclub.

Eise beschte Rotschlag

Dës Gebrauchsuweisung ze liesen ass de beschte Rotschlag, dee mer der kënne ginn. Du muss net alles op ee Coup liesen, schonn déi éischt Kapitelen ze liese wäert der eng gutt Iddi ginn, wéi een d'Spill spillt. Wann et nach ee Rot gëtt, dee mer der kënne ginn, dann ass et deen, fir all deng weider Froen am Forum ze stellen. Et gëtt souguer e Forum, dee genee fir déi Froen do ass.

Et gëtt do nëmmen eng Saach, op déi mer insistéieren: Fir datt s du an all déi aner dat beschtméiglecht Hattrick-Erliefnes kënnt hunn, ginn et ganz einfach Regele vum Behuelen, déi s de an eisen Hausregele kanns fannen.
 
 
Dës Säit bewäerten
Server 095